Omines
Nos semus adobiaos unu manzanu de iberru in Nugoro
Deo fipo a ziru pompiande ferros betzos in su mercau de antigorias chi fachen su sàpadu in bia Majore cando so arribbau a ube fit issu.
Su banchittu suo fit garrigu de fossiles galu tentos in sa terra chi los at custodios, trastes e isterjos de preda bene traballaos e finios, predas de quarzo e de selce traballada e grezza ma una cosa m’at tirau s’ocru: unu prattereddu prenu de puntas de fritza de selce

Mi soe firmau a negossiare chin issu. Beniat dae Castiadas e pro campare s’aiat imbentau cussu traballu ca li permittiat de biazzare, deo brullande l’apo nau chi fit unu benduleri feniciu issu ridende m’at nau chi fit de casta celtica ca beniat dae su nord de Italia, ma chi unu pacu aio resone ca fin trint’annos chi istabat in sardigna biazzande a africa
m’at nau chi su prus de sos trastes chi bendiat fin artigianau africanu e antigorias de su neoliticu de su sahara chi comporabat in marocco in sos bidarjos a inghiriu de su desertu m’at mustrau istraleddas de preda pesicheddos, predas pro molere e fossiles betzos de milliones de annos,
pompiandelos mi sun bennios a conca sos marmaros de orosei chi si los pompias t’abbizzas chi ses ponende sos pedes supra unu museo

L’apo nau chi traballabo sa preda nighedda e l’apo mustrau ite nde bocabo issu m’at pediu si aio predas grezzas e traballos finios de li dare ca no aiat ossidiana in sa mercantzia sua e amus cuncordau unu barattu
A mime no m’est passiu beru de barattare unu pacu de puntas de preda nighedda chin cussas puntas de selce,

E amus cuncordau de nos torrare a adobiare pro barattare predas grezzas
E gai est istau, cando nos semus torraos a adobiare deo l’apo dau pacas castas de ossidiana e issu m’at dau pacos nucleos de selce crara de su sahara. cando nos semus saludaos m’at nau Oie est una die galana, nos semus adobiaos e amus torrau a fachere tzestos anticos de milli e milli annos Deo l’apo nau : Custa cosa no nos azunghet deche francos a buzzaca ma oie pro su chi balet at balanzau su coro e mi nde cuntento
A mezus biere chin s’ispera de t’adobiare galu in su biazzu de sa bida.

traballos ottennios dae selce africana