Passibale

In su monte ‘e Nugoro, cara a Monte Jaca si pesat mannu su roccarju de punta Pala casteddu. In pedes suos b’at unu baddicru reparau chi si mutit Passibile.
Custu est unu locu galanu chi deo apo iscopertu cando fipo pitzinnu sichinde dae Isporosile su bolu de sos astores chi si pesaban dae punta Passibale.
Pro pitzinnos che a nois, chi fimus sempere a ziru in sa badde cussa fit una tentassione cheriabamus cassare sos astoreddos pro los pesare ammasedaos.
E gai,una die de istiu pro balentia chin Antoni unu cumpanzeddu de bichinau semus essios, iscurtos comente si costumabat barant’annos fachet in Monte Jaca, nos amus picau ifattu unu farchione e unu cannabu e chin sa frundia in buzzaca semus tuccaos a chircare su nidu de s'astore .
Picande pro s’istrumpu ‘e tittibeddu,su canale chi dae Isporosile essit a su paris de Sedda Ortai, apustis de una paia de oras de gherra, chin sas ancas totu arrancadas dae sos rubos e dae sa tiria semus arribaos a su cantareddu de sa Radichina.

Dae cue amus sichiu un’andada chi colande in mesu de sa nodera nos at batiu a unu baddicru e cue una borta intraos nos semus perdios. Amus zirau su locu, ma pariat unu labirintu de roccas e tuppales chin sas camineras apertas dae sos animales chi non andaban a niddube

Zirande in cussu locu amus acattau unu trettu ube bi fin tres concheddas tancadas a alapinna e a inghiriu trattas de zente. Cussu locu nos at postu unu pacu 'e timoria.
Semus accurtziaos e amus bidu ispartinaos a ziru trastes de cubile, amus ghettau boche ma nemos nos at torrau risposta, tando chene accurtziare semus moghios pro essire a sa punta 'e su cuccuru pro pompiare sa badde dae artu.

Dae cue amus bidu s’astore torrande, dae sa badde de Isporosile.
L’amus osserbau e amus bidu ube aiat su nidu, o mezus amus bidu sas trattas in sa rocca ca non fachiat a l’accurtziare postu comente fit in d’unu coloncone in artu e inghiriau dae sa tiria.
Amus dau borta, dae cue a unu pacu amus acattau sa caminera zusta chi colabat in pedes de sa rocca, e semus torraos a Isporosile

Apustis de meda tempus so torrau a passibale. Como a sa bena de sa radichina arribat s’istrada e sa caminera chi falat a Passibale est sinzada dae su wwf, ma su locu est galu gai.
In sa falada in fiancos de su roccarju apo acattau una conchedda chi non connoschio. Soe intrau, su locu fit totu bortulau; apo osserbau su terrinu e mi so abizzau chi cussu fit un’interru anticu forroncau dae sos chircadores clandestinos de antigorias chi an firmau apustis de milli e milli annos su sonnu de s’omine chi cue aiat sa tumba